Heim Beint á efnisyfirlit síðunnar

GARÐABÆR 2018 - 100 ÁRA FULLVELDI ÍSLANDS

Búum til ljósmyndasýningu  - Hvernig lítur Garðabær út árið 2018?


Menningar- og safnanefnd og Bókasafn Garðabæjar leita til ykkar, íbúa Garðabæjar og annarra sem hugsa hlýtt til bæjarins okkar um að búa til lýsandi ljósmyndasýningu um hvernig Garðabær lítur út árið 2018. 

Myndefni er að eigin vali. Mynd á að vera úr Garðabænum, lýsa daglegu lífi Garðbæinga og hvernig er umhorfs í bænum okkar á árinu 2018, 100 árum eftir að Ísland varð fullvalda ríki.

Við viljum fá ljósmyndir frá þér sem eru teknar á árinu 2018 ásamt lýsingu á stað og stund. Hver tók myndina? Hvað er á myndinni? Ef eitthvað er að gerast, hvað er í gangi? Hvaða árstíð? Klukkan hvað er myndin tekin? Hvar er myndin tekin? Hvers vegna er þessi mynd tekin, hver var innblástur ljósmyndara? 

Ljósmynd getur verið úr persónulegu lífi fólks, frá opinberum viðburðum á öllum sviðum eða af daglegu lífi í bænum. Mynd getur þannig lýst mannlífi, byggingum, umhverfi og/eða landslagi.
Þátttakendur í sýningunni geta verið á öllum aldri; börn, ungmenni, fullorðnir og eldri borgarar.

Ljósmyndir mega vera annað hvort í lit eða svart hvítu. Ljósmyndir þurfa að vera í fókus og skýrar. Æskileg stærð myndar er 1-4 MB. Hver ljósmyndari/þátttakandi má senda inn allt að tíu myndir.

Ljósmyndir ásamt lýsingum á þeim sendast inn á skráningarformi hér fyrir neðan í síðasta lagi fyrir kl. 24:00 laugardaginn 1. desember 2018, á 100 ára afmæli fullveldisins. 

Úr innsendum ljósmyndum verða valdar myndir á ljósmyndasýninguna Garðabær 2018 – 100 ára fullveldi Íslands, sem verður opnuð á 50 ára afmæli Bókasafns Garðabæjar, þriðjudaginn 18. desember 2018. 

Veittar verða viðurkenningar fyrir 5-10 athyglisverðustu ljósmyndirnar. Við val á þeim verður skoðað hvernig ljósmyndara tekst að ná á ljósmynd umhverfi, landslagi, bæjarbrag og mannlífi í Garðabæ árið 2018.


Menningar- og safnanefnd og Bókasafn Garðabæjar

 

INNSENDING MYNDA

Hver ljósmyndari má senda allt að 10 myndir, eingöngu er hægt að senda 3 myndir í einu með því að fylla út innsendingarformið hér fyrir neðan.  Æskileg stærð mynda er 1-4 MB.  Myndir mega vera í svarthvítu og lit. 

*Stjörnumerkta reiti þarf að fylla út.

Ljósmyndasýning 2018
English
Hafðu samband