Sumarlestur- vertu með!

Fyrir hverja:

Sumarlestur er fyrir öll börn á grunnskólaaldri og ekki síst þau sem eru að læra að lesa. Sumarlestur hefur það að markmiði að hvetja til lesturs í sumarfríi skólanna og þannig viðhalda og auka við þá lestrarfærni sem börnin hafa öðlast yfir veturinn.
Lestur eflir málþroska, bætir orðaforða, eykur þekkingu, auðveldar nám og örvar ímyndunaraflið.

Hvernig:

Skráning í sumarlestur á Bókasafni Garðabæjar hefst síðasta laugardag í maí á Garðatorgi. Þá mega krakkar mæta með foreldrum eða forráðamönnum á bókasafnið og skrá sig. Krakkar sem hafa aldur til geta að sjálfsögðu komið án fylgdar fullorðinna. Það er hægt að skrá sig í allt sumar því það er aldrei of seint að byrja. Þegar börnin skrá sig til þátttöku fá þau afhenta lestrardagbók. Í hana skrá þau bækurnar sem þau lesa í sumar og fá límmiða við hverja komu á bókasafnið. Þegar þau hafa lesið bók mega þau skrifa umsögn og setja í lukkukassa sem er í bókasafninu. Við drögum heppinn lestrarhest í hverri viku og fær sá eða sú bók í verðlaun. Uppskeruhátíð verður haldin að hausti og þá fá allir virkir þátttakendur glaðning og lestrarárangrinum verður fagnað með skemmtiatriðum og góðgæti.

Allar upplýsingar er varða persónu verða nýttar til tölulegrar úrvinnslu gagna. Þeim verður ekki deilt með þriðja aðila og eytt að sumarlestri loknum.

Sumarfjör

Þriðjudagar:

Leshringurinn Lesum saman er ætlaður fyrir krakka á aldrinum 6-12 ára þar sem þau taka með sér eldri lesfélaga (foreldri, ömmu, afa, frænku, frænda, eldri systkini o.s.frv.). Leshringnum sem verður stýrt af starfsfólki bókasafnsins og hefur þann skemmtilega tilgang að búa til umhverfi þar sem þátttakendur eiga saman gæðastund þar þeir fá aðstoð við að velja sér lesefni og rætt verður saman um bækur á léttum nótum.

Þegar búið er að lesa eina bók saman er hægt að fylla út happamiða sem fer í lukkupott. Dregið verður úr lukkupottinum eftir samveru þann 6. ágúst sem verður vinningurinn svo afhentur á síðustu samverunni þann 13. ágúst.
Leshringurinn verður á hverjum þriðjudegi í sumar frá klukkan 14-15 frá 11. júní til og með 13. ágúst.

----English----
Reading circle for children and adults together. Will be held in Icelandic.

Þriðjudagsleikar: Stuð og stemmning í útileikjum með starfsfólki Bókasafns Garðabæjar á Garðatorgi. Boðið verður upp á tónlist, útikeilu, teygjó, snú snú, krítar og margt annað. Allir krakkar velkomnir.
Þriðjudagsleikar verða á hverjum þriðjudegi frá klukkan 13 – 15 frá 11. júní til og með 13. ágúst.

----English----
Tuesdaygames: Outdoor games with the library staff at the square in front of the library at Garðatorg 7. Music, outdoor bowling, jump rope, chalk and much more. All children welcome.
Tuesdaygames will be held every Tuesday from 13-15 from 11. June to 13th of August.

Miðvikudagar :

Ljósaborð og segulkubbar: Myrkraverk á bókasafninu á miðvikudagsmorgnum í sumar. Boðið verður uppá ljósaborð og segulkubba inn í Svítunni þar sem við dimmum ljósin og leikum okkur saman. Í boði alla miðvikudaga í sumar klukkan 9-12 frá 12. júní til og með 14. ágúst.

----English----
We will have a lightboard and Magna Tiles from 9 to 12 to play with. All children welcome.

Tæknifikt: Boðið verður tæknifikt inní Sköpunarskúffunni klukkan 13 alla miðvikudaga í sumar en þar er að finna þrívíddarprentara, vínylskera og saumavél. Á miðvikudögum í sumar verða í boði fjórir 30 mínútna kennslutímar í þrívíddarprentarann. Vinsamlegast pantið tíma í afgreiðslu bókasafnsins með tölvupósti bokasafn@gardabaer.is, síma 5914550 eða á staðnum.

Alla daga fyrir hádegi nema miðvikudaga er hægt að mæta til þess að setja af stað flókið verkefni í þrívíddarprentarann.

Fimmtudagssmiðjur:

Fimmtudagsfjör fyrir káta krakka er smiðja fyrir grunnskólabörn á milli klukkan 10 og 12. Lestrarhestur vikunnar er dreginn í lok smiðju og hlýtur glaðning að launum. Föstudagsfjör stendur yfir frá miðjum júní og fram í miðjan ágúst.

Tímabil:

1.júní til 24.ágúst

Lokahátíð og verðlaunaafhending fer fram 24. ágúst. Frekari upplýsingar er að finna í vefdagatali og Facebook bókasafnsins þegar nær dregur.

Sumarlæsisdagatal Menntamálastofnunar gefur margar hugmyndir um hvar og hvernig er hægt að lesa. Hér er hægt að opna það á vefnum: sumarlæsisdagatal