Viðrini veit ég mig vera

Magnús Þór Jónsson, Megas, hefur um langt skeið verið einn umdeildasti listamaður þjóðarinnar. Hann hefur gefið út fjölda hljómplatna með eigin lögum og textum, þýtt og samið leikrit, skrifað skáldsögu og málað myndir. Óttar Guðmundsson læknir, höfundur bókarinnar, er frændi Megasar og vinur til margra ára. Í bókinni er æviferill Megasar rakinn og verk hans skoðuð. Óttar veltir því fyrir sér hvað mótaði Megas og hvernig skáldið hefur sett mark sitt á samtíð sína. Hann fjallar um helstu viðfangsefni Megasar, mannlegan breyskleika og dauðasyndirnar sjö sem leika stórt hlutverk í lífi hans og verkum. Í bókinni eru birt mörg myndverk eftir Megas.
Höfundur: Óttar Guðmundsson

Óttar Guðmundsson

Óttar Guðmundsson fæddist í Reykjavík 29. apríl 1948, ólst þar upp og gekk í MR. Hann útskrifaðist úr Læknadeild HÍ 1975, fór í framhaldsnám til Svíþjóðar, lauk þaðan sérfræðiprófi í lyflækningum 1984 og skrifaði doktorsritgerð sama ár. Hann varð sérfræðingur í geðlækningum árið 1992. Hann hefur verið við nám í sögu og þýsku í Þýskalandi síðastliðin tvö ár.
Óttar hefur starfað sem heilsugæslulæknir í Keflavík, læknir og yfirlæknir á Vogi og sérfræðingur á Vífilsstöðum og Teigi. Hann starfar núna á geðdeild Kleppsspítala.

Ritaskrá
1990 Íslenska kynlífsbókin (tilnefnd til Íslensku bókmenntaverðlaunanna)
1992 Tíminn og tárið
1993 Það sem máli skiptir
1996 Kvennamaður deyr (skáldsaga)
2000 Listin að lifa, listin að deyja