Spennusagan Vetrarmein eftir Ragnar Jónasson

Aðfaranótt skírdags finnst lík af ungri konu á gangstétt fyrir framan þriggja hæða hús við Aðalgötuna á Siglufirði. Skömmu síðar skrifar íbúi á hjúkrunarheimili í bænum með æpandi rauðum lit á vegginn í herberginu sínu: Hún var drepin. Ari Þór Arason lögreglumaður, sem lesendur þekkja úr Siglufjarðarseríu Ragnars, þarf að glíma við undarlegt og óhugnanlegt mál. Páskahelgin er að ganga í garð. Fólk hefur flykkst til bæjarins. Og stórhríð er að bresta á. Ragnar Jónasson er einn fremsti spennusagnahöfundur Norðurlanda. Bækur hans eru gefnar út á um þrjátíu tungumálum. Þær hafa setið vikum saman í efstu sætum metsölulista víða um heim og selst í tæplega tveimur milljónum eintaka. Vetrarmein kemur samtímis út á Íslandi og í Frakklandi. Glæpasagnahöfundur á heimsmælikvarða. The Sunday Times Ekkert minna en tímamótaverk í glæpasögum samtímans. The Times, um Huldu þríleikinn Fáir rithöfundar samtímans búa yfir viðlíka hæfileikum til að töfra fram andrúmsloft og flétta gátur. A. J. Finn, höfundur metsölubókarinnar Konan í glugganum.