Spennusagan Ríki hinna blindu eftir Louise Penny

Gömul kona á afskektum sveitabæ óskaði eftir því í erfðaskrá sinni að lögregluforinginn Armand Gamache yrði skiptastjóri bús síns. Það kemur Armand spánskt fyrir sjónir, því að hann þekkir hvorki haus né sporð á konunni. Hann heldur því að um eitthvert grín sé að ræða, enda eru ákvæði erfðaskrárinnar býsna skrýtin og ólíkindaleg. En við líkfund fær erfðaskráin skyndilega aðra og ískyggilegri merkingu. Þótt Armand sé í tímabundu leyfi frá störfum fer hann að rannsaka málið. Auk þess keppist hann við að reyna að leiðrétta það sem varð til þess að hann var skikkaður í leyfi. En við það þarf hann að horfast í augu við sjálfan sig … Bækur kanadíska skáldsagnahöfundarins Louise Penny um lögregluforingjann Armand Gamache hafa farið sigurför um heiminn. Bækurnar hafa ekki aðeins setið í efstu sætum metsölulista heldur er höfundurinn margverðlaunaður fyrir þær.